بسم الله الرحمن الرحيم
اعزائى متابعى موقع شبكة الروميساء التعليمية
يسعدنا ان نسرد لحضراتكم بعض المعلومات الهامة للمدارس الثانوية المختلفة
ايه الفرق بين الثانوي العام والثانوي الخاص والثانوي العسكري والثانوي
العسكري الجوي والثانوي العسكري الرياضي و التمريض العام والتمريض العسكري و
الثانوي الفني والثانوي التجاري والزراعي والصنايع و مدرسة الضبعة ومدرسة
المياه ومدرسة الكهرباء و الاكاديمية الدولية للحاسبات والمعلومات؟؟
.
وطبعا محدش بيجاوب لأن الموضوع طويل جدا جدا والاسئلة فيه كتير
.
1- الثانوي العام هو الثانوي المعروف بإسم الثانوية الجديدة اللي حضرتك هتستلم فيها التابلت
الدراسة 3 سنين وبعدها تدخل اي كلية تعجبك سواء كليات عسكرية أو عادية.
.
2- الثانوي الخاص : هو هو الثانوي العام ولكن بيكون تبع المدارس الخاصة ودي للناس اللي معاهم فلوس مش الفقراء اللي زي حالاتي
الفرق بس إنك بتدفع مصروفات للمدرسة غالية شوية و بتاخد من مجموع 140 فيما
فوق وبعض المدارس الخاصة بتشترط يكون مجموعك مثلا 170 او 180 ، قال يعني
مدارس مش بتقبل غير الشطار ، لكن لو شخللت جيبك شوية هيقبلوك عادي
هتتخرج من الثانوي الخاص وتدخل برضو أي كلية عسكرية أو عادية براحتك.
.
3- الثانوي العسكري والجوية و العسكرية الرياضية
كلها مدارس تبع الجيش وبتتخرج منها و تدخل اي كلية عسكرية او عادية عادي
وتدرس نفس مناهج الثانوي العام بالظبط. الفرق بينها وبين مدارس الثانوي
العام والخاص هو انك بتدرس مادة زيادة اسمها تربية عسكرية ومش بتضاف
للمجموع بتاعك .
الثانوي العسكري بنين بس
الجوية اتلغت
العسكرية الرياضية بنين بس
طبعا بتخضع لكذا كشف طبي وهيئة ...الخ
.
4- التمريض العام بقى هو هو التمريض العسكري بالظبط ولكن الإختلاف بينهم
انك العسكري تقدر تشتغل به في المستشفيات العسكرية وطبعا بتحتاج كشف برضو
دقيق عليك ، وبنين وبنات برضو. وفيه ناس بتقول أن التمريض العسكري بعد
الثانوي مش الاعدادي.
.
5- الثانوي الفني بكل أقسامه والصنايع معروف تخلصهم وتقعد وممكن تكمل بعدهم في أي كلية عادية.
6- مدرسة الضبعة تعتبر ثانوي فني موجودة في مطروح والطالب يقيم في المدرسة و
مخصصة للطاقة النووية عشان المفاعل النووي اللي مصر هتعمله
.
7- مدرسة الكهرباء والمياه تعتبر ثانوي فني ولكن مخصصة للعمل في شركة الكهرباء والمياه
8- الاكاديمية الدولية دي بقى ب 7000 جنيه في السنة بنين بس وبرضو بتاخد من مجموع قليل وتتخرج منها تدخل أي كلية.
الخلاصة
كل المدارس هتخلص منها وتدخل جامعة عادي
المدارس العسكرية بس بتحتاج كشف طبي دقيق مش اكتر وعايزة انضباط و واسطة.
التمريض ميزته أنك ممكن تشتغل به من غير ما تكمل في الكلية.
بالنسبة بقى للتنسيق لسة بعد النتيجة ما تظهر بأسبوع او 10 ايام واي تنسيق على النت سيبك منه لأنه بتاع السنة اللي فاتت